Vicensa Serenessima çità

Parchè la Liga Veneta Republica ?

Da massa tempo el Veneto el manca de 'na rapresentansa politica degna de sto nome; un gran patrimonio de autogoverno el xe andà perdù e desmentegà cussì che ancò par tuti par naturale che a deçidere del nostro futuro gabia da essare solo e sempre quei che non xe Veneti.

La Liga Veneta Republica la gà come obietivo prinçipale la riapropiassion da parte del Popolo Veneto de la so autonomia e del so autogoverno.

'Na indipendeza fata non a ciacole ma 'na realtà che la gà da essare costruia passeto   dopo passeto a scominsiare da robe serie e de sostansa.

El Veneto coe altre region el xe drento l'Union Europea e con l'Europa noialtri a dovemo confrontarse tegnendo conto quanto la nostra tera la xe drento ne 'la realtà europea par queo che riguarda la cultura, l'economia e la storia.

El stato italian desmentega el nostro bisogno de autonomia detà da la necesità de adeguar la nostra vita a 'na società che no pol pì soportar el çentralismo invadente e bon da gnente.

El Stato nel Veneto el gà da tornare a essare un amico del çitadin e non un paron che ne roba con prepotensa tuto quel che gavemo.

Xe necesario par prima roba rifarse a le regole de lo Stato italian mai rispetae(tipo el referendum su l'abolission del Ministero de l'agricoltura); se ghe fosse de le question co loStato italian, xe posibile ciamare la Comunità Europea che, un mucjo de volte, gà bastonà l'Italia par le so desmenteganse.

La nostra region la dà un fraco de schei a lo Stato italian e lù ghe dà indrio solo fregole; par combatare 'sta distribussion iniqua de la richessa ,xe importante metare insieme tute le forse venete che par davero voja darghe un tajo a 'sta intolerabile ingiustissia.

Tegnendo ne la nostra tera 'na parte dei schei , xe posibile far qualche intervento su un mucjo de setori ancò sbandonà e desmentegà: fameja, xovani, ansiani, sanità,ambiente, strade etc.

La Liga Veneta Republica xe un punto de riferimento par tuti quei che vole dare risposte serie a 'na comunità, a un Popolo che nol pol pì spetare.

" sta tera xe la me tera, sta tera xe anca la to tera "

L'identità de un popolo xe ligà a l'esistensa del so teritorio, cussì che l'un e l'altro i se influensa : na comunità che la perde la so memoria la vedarà sbregà el paesaggio vissin , un teritorio rovinà el sarà abità da un popolo che prima o dopo el perderà la so memoria.

La çità de Vicensa la presenta da un saco de tempo 'na grave crisi de identità sia par queo che riguarda l'urbanistica, el sociale, l'ecologia e la cultura.;

'sto stato el gà sbasà la qualità de la vita de la nostra xente, che varda sensa poder gnanca dir na 'na parola, la rovina dela so tera.

Bisogna andar vanti su do strade:

1) Vicensa ancò o par mejo dire , l'emergensa e queo che bisogna far desso

2) Vicensa doman o par mejo dire, far un progeto grando par el futuro

 

Vicensa anco'

Sensa l'autonomia politica e finansiaria ,l'aministrassion comunale , non importa quae che la sia, gavarà margini striminsii de manovra par poder intervegnere alle raise dei problemi :bisogna scominsiare dai bisogni pì importanti

1) VICENSA AMICA

L'AMINISTRASSION COMUNALE O PAR MEJO DIRE, EL PALASSO DE TUTTI

Lo Stato par la Liga Veneta Republica el gà da diventare amico dei çitadini e 'sta rivolussion nel modo de comportarse gà da scominsiare da la aministrassion comunale.

Xe necesario rifare diriti e doveri dei çitadini ma anca se gà da oiare la machina de l'aministassion, fasendo metare in bela evidensa che el Comune el xe la casa de tuti, un servissio par tuti i çitadini e non un casteo çircondà da fossi e ponti che se alsa e sbasa, fabricà par tegnare distanti i çitadini.

Par voltar pagina , bisogna scrivare 'na carta dei diriti del çitadin cussì da stabilire sensa tante ciacole un codice de comportamento par tuti, çitadini e aministrassion publica.

2) VICENSA SICURA

EL CONTROLO DE LA TERA O PAR MEJO DIR, LA SICURESSA

La prima condission par na convivensa çivile xe dà da la posibilità de ogni çitadin de poder vivare sensa la paura de avere qualche violensa fisica o morale e de non sentirse paron a casa sua parchè i lo minacia in casa o par le strade de la so çità. Xe a dir el vero baso el livelo de sicuressa, difati i ne vien a robare drento a le nostre case; 'na situassion che la fa paura, che non la poe essare combatua tanto da le forse de polissia parchè i no poe ciapare chei farabuti e se li ciapa, dopo do gioni li vede de novo fora !!.

Bisogna far de la prevension, fata anca dai vigili de quartiere che i podaria avere con i çitadini un raporto de colaborassion col controlo completo del teritorio.

Par quanche punto caldo de la çità bisognaria aumentare le forse de polissia sia de note che giorno, magari anca doperando de le telecamere fisse.

3) VICENZA LESIERA

LA DISMISSION O PAR MEJO DIRE , L'ECOLOGIA DE LA POLITICA

La Liga Veneta Republica la xe contraria fin in fondo a la logica politica che la favorisse la creassion de enti e organismi che, par el fato che i no xe strategici par le competense e priorità del Comune , i destina male i schei che i xe xa pochi, con tanti dani par tuti noialtri.

In 'sta maniera se forma de le struture de sotogoverno che le xe de dubia moralità civica e che le dà "piaçeri" in cambio de "piaçeri".

Va çercà le priorità operative dove el Comune gà da impegnarse anca ne la gestion ( sociale, scola, disagio dei xovani, PRG,PUT etc.) e se gà da scominsiare na seria politica de desmission de Enti e de sbandono de Organizassion che i privati podaria far funsionare.

Par la Liga l'Ente Comunale quando el se intaresa de enti come La Società Aeroporti Vicentini, marcà de fruta e verdura, çentro intermodale servissi,College Valmarana Morosin SPA e altri,el gà da dare solo sostegni e indirissi che dovaria riguardare come o dove metare ste struture, jutando el so inserimento nel teritorio e pareciando solussion che le fassa funsionare al mejo.

4) VICENSA BELA

L'URBANISTICA O PAR MEJO DIRE, L'ORGOGLIO PERDUO

"Citta del Palladio ", cussì par anni e anni la nostra çità la xe sta conosuda in t'el mondo.

' Na çità belisima ,cresù su l'acqua come quasi tute le çità venete, in piena armonia co l'ambiente che le çirconda.

Far conosare a un foresto le vie del çentro e i posti fora le mura, gera par ogni visentin un momento de gran feliçità , come ogni omo xe orgoglioso de mostrare la so casa bela e ospitale.

E ancò ??

La çità gà perdù la so personalità par colpa de aministrassion che gà vardà gli intaressi de pochi e non gli intaressi de la çità, intesa come insieme de omeni, storia, e cultura.

 

Bisogna intervegnere con corajo

1) Controlare sul serio che le concession edilissie le sia legali

2) Recuperare queo che xa esiste (çentro storico)

3) Mantegnere e aumentare el verde ( un parco-un quartiere)

4)Risanare e recuperare i fiumi come spassio par tuti toendo i fondi CEE, creare un orto botanico

5)Colaborare con i Comuni viçini par le politiche urbanistiche e teritoriali.

 

5) VICENSA LIBERA

EL TRAFICO O PAR MEJO DIRE , 'NA PRESON DA BUTAR SO'

Un problema grando xe queo de la viabilità che la gavaria bisogno de 'na bea   progetassion.

Desso saria necesario far che almanco vegna finia via Aldo Moro che insieme a la complanare la podaria sbasare el trafico che passa drento la çità.

Va progetà e realizà ,anca con convension coi privati, parchegi lesieri, dislocà in punti de la çità a tarife diferensià a seconda de la distansa dal çentro storico(Viale Verdi,Canove Vecje, Eretenio,ex macello).

Cussì faxendo se riduria l'inquinamento da auto e saria pì façile andar drento el çentro storico che' el gà bisogno desso de 'na rivitalisassion .

Bisogna anca fare piste ciclabili in maniera da poder da fora rivare in çità con la bici.

6) VICENSA SOLIDALE

EL SOCIALE O PAR MEJO DIRE ,LA RICHESSA DE DOMAN

La nostra comunità la gà da domandarse come se podarà afrontare realtà che in tanti casi xe e sarà vere emergense sociali.

1) gli ansiani e l'individuassion de spasi ricreativi e de volontariato par omeni e femene,

che tanto poe ancora dare a la società.

2) gli ansiani e el problema de le case de riposo: la riorganisassion de le IPAB a streta integrassion con Comune e l'ULSS.

3) i xovani e la mancansa de spasi de aggregassion(locali sia in çentro storico che fora dive i xovani i possa ritrovarse e esprimerse ).

Particolare atension va dà a le società sportive sensa guadango che le gà bisogno de   avere agevolassion par quel che le fa par tirar fora i xovani da le strade.

4) la fameja e el problema de la prima casa par la quale ghe xe bisogno de agevolassion e va çercà de le graduatorie de asegnassion par le case popolari che favorisa i residenti da almanco çinque anni in çità, jutando cussì chi che vive e lavora ne'l so teritorio.

5) el lavoro par el quale se propone de cambiare i regolamenti comunali relativi ai concorsi e a le procedure de assunsion tegnendo conto tra i titoli da ciapare in esame, anca la residensa nel Comune e nel Veneto.

6) la scola materna e elementare che le gà bisogno de un censimento e de 'na rasionalisassion dei plessi scolastici, che i gà da essere fati secondo le norme de sicuressa.

7) i portatori de andicap che i gà bisogno che se intervegna façilitando l'inserimento ne la vita sociale de la çità, scominsiando col butar so le bariere architetoniche.

8) la tosicodipendensa che la gavaria bisogno de un coordinamento de le comunità.

9) el volontariato dove el Comune el poe avere 'na importante asion de coordinamento par non butar via 'na cussì granda richessa.

 

7) VICENSA NETA

L'ECOLOGIA O PAR MEJO DIRE , QUALE TERA PAR I NOSTRI FIOI ?

El problema de le scoasse : bisogna far in modo de aumentare la "cosciensa ecologica" dei çitadini e urtare ne la diression de la racolta diferensià magari con sistemi xà sperimentà che i premia chi che produse manco scoasse.

Rete ad alta tension: l'aministrassion Comunale gà da essare amica e garante dei citadini e alora la gà da intervegnere parchè sia fato da parte de l'ENEL , l'interamento de la rete ad alta tension oponendose a decision che no le tegna conto de la salute e de le preocupassion dei citadini.

Alta veloçità :Bisogna jutare el pasajo del trasporto da goma a rotaia.

El sistema feroviario va amodernà a sto amodernamento gà da intaressare anca la çità

de Vicensa.

No al progeto de desso TAV che el masacra el teritorio, ch'el diventa de sicuro un posso de tangenti e no'l risolve i problemi gravi de la rete feroviairia de la nostra provincia e de la nostra çità.

Va selta 'na solussion che la rispeta el prinçipio de la susidiarietà , che la ridusa i danni a la tera e che la juta el trasporto de le merci e de le persone.

8) VICENSA NOSTRA

LA CULTURA O PAR MEJO DIRE, EL TESORO SCONTO

La nostra çità la xe stà tegnù par massa tempo distante dai grandi cirsuiti culturali europei, fato questo par gnente naturale tegnendo conto de le richesse artistiche che Vicensa gà.

Va considerà anca la posission strategica che gà sta çità: postà come la xe nel cuore del Veneto la podaria esare non solo la meta par al visita de le belesse in loco, ma podaria diventare un punto de partensa par visite in altri posti e çità venete.

Xe necesario alora scominsiare un lavoro de valorisassion de quel che xà che xe, sensa però fermarse qua.

Importante saria la creassion de un museo de arte moderna che podaria esare messo con un parchegio dove ghe gera el macello secondo el progeto del alchiteto Gregotti o al Centro Domus.

El raporto coi operatori turistici el diventa esensiale, un rappporto che gà da essare de streta colaborassion par trasformare el turismo de ancò"morsega e scapa " in un turismo de do- tri giorni.

A parte ste inissiative xe necesario jutare quee proposte culturali che le nasse da la storia, da la tradission del Veneto con tanta atension a la lingua veneta, come el Consiglio l'Europa nel marso del 1988 gà stabilio che le popolasion le gà el dirito de esprimarse ne le so lingue regionali sia ne la vita privata che in quea sociale.

Importante xe la funsion de la scola elementare (studio de la storia,de la cultura, de le tradission e de la lingua veneta) .

Va invesse butà via le inissiative vegnù fora da mode consumistiche e che non le gà gnente de la nostra tradission e cultura.

9) VICENSA INDUSTRIOSA

L'INDUSTRIA O PAR MEJO DIRE, EL PROGRESSO RAGIONEVOLE

La question industriale par Vicensa gà da essare drento 'na vision generale del teritorio çitadino e extraçitadino ,difati bisogna considerare l'aspeto urbanistico,viabilistico e ecologico.

Cussì fasendo xe posibile metare insieme progreso e qualità de vita dei citadini.

Xe importante tegner conto che 'na gran parte del setore industriale xe dà dal tersiario avansà e dai servissi, tuti e dò i se caraterizà par aver un alto livelo tecnologico, un basso impato con l'ambiente e i xe adatissimi al nostro teritorio che gà xà tocà i liveli de guardia par queo che riguarda l'inquinamento e la cementificassion del terreno.

Sto tipo de industria la va jutà tegnendo conto de quanto tuto el mondo impreditoriale de la provincia el sia bisognoso de na rete de servissi moderna e anca eficiente.

Par sto setore come par l'oreficeria,la stampa,la tipografia, la confession, xe necessario pensare spasi dislocà ben e tegnù su da na bona rete de strade par evitare 'na disseminassion disordinà de plessi industriali difiçili da ragiungere con i mezi de trasporto.

Xe anca importante l'aspeto promosionale del "Made in Vicensa " e par sto fato bisogna rilanciare la Fiera che la gà da esare sempre operativa.

El Comune gà da jutare anca el pì posibile la colaborassion tra enti diversi come l'Aministrassion Comunale,l'Università e el mondo industriale.

10) VICENSA DE LE ARTI E DEI MESTIERI

EL COMERCIO E L'ARTIGIANATO O PAR MEJO DIRE, EL PASA' DA SALVARE

El comercio e l'artigianato çitadino da tempo el sta vivendo 'na crisi che gà da finire parchè no vegna perdù un gran patrimonio sociale e culturale.

Par çerte scelte urbanistiche dela pasà , el çentro storico xe diventà par quasi tuti, 'na " çità proebida "-

La mancansa de parchegi drento le mura e la dificoltà de poder star fermi vissin al çentro sta fasendo andar via i visentini da la so çità, cossa che gà obligà tanti comercianti e artigiani a sarare le boteghe.

Se gà formà un çircolo vissioso e la situassion la xe sempre pì fisiçile par chi vive nel çentro storico specie se non xe pì xovane e tutto sto disastro par scelte fate da politici distanti dai veri bisogni dei citadini.

Xe necesario alora parmetare a le persone de vivare la çità lasandoghe andar drento la çità.

Va anca previste agevolassion par el transito drentp le mura par comercianti e artigiani che proprio nel cuore de la çità i gà la so atività.

Par quel che riguarda el comercio fora nei quartieri de periferia, va dito che ghe xe na sproporsion tra la popolasion e el numero de grandi çentri comerciali.

Sto fenomeno gà provocà la crisi del comercio al detajo e de l'artigianato locale.

Xe necesario alora oporse ai novi mega çentri comerciali che i fa diventar mati par el trafico che i porta e che i conçela la rete de negossi e boteghe cussì utili par la xente dei quartieri e cussì importante par la qualità de vita ,fata anca de raporti umani.

 

VICENSA DOMAN

 Par la Vicensa del doman xe necesario un gran progeto creativo che rifassa la çità co 'na vision che la varda vanti nel tempo e che la preveda 'na riorganisassion de tute le parti del teritorio urbano.

In sto momento sarà posibile deçidere se o dove espanderse, sarà posibile pensare servissi publici che no i sporca,strade, teatro,stadio, tuti ordinà ne la nova unità urbanistica.

A sto progeto xe necesario pensare ancò, parchè n'altro ritardo podaria comprometare tuto el lavoro de doman.

Tuto andaria fato rivardando i progeti xa fati, pagà da la comunità e sbandonà in qualche caseto oppure indiçendo un concorso nassionale e internassionale con l'obiettivo de individuare la solussion pì giusta par le esigense sociali e ambientali.

A quelo che vinse vegnaria dà la guida dei lavori e la progetassion no la costaria gnente a la comunità.

Vicensa gà da esare çità fata par i omeni che no vol dire 'na çità fora dal mondo, invesse la nova Vicensa europea la poe esare un esempio de un diverso modo de concepire el spasio urbano caraterisà da ' na continua riçerca de equilibrio tra le protession de l'ambiente e de al tradission e la voja de conoscere culture e esperiense de altri popoli.

Beggiato Ettore.

 | La storia vista dalla parte dei Veneti | Consiglio regionale | Appuntamenti | News | e-mail me | Home page |